Bjarni Benediktsson, þú ert rekinn.

Reykjavík, 7. apríl 2016

Fjármálaráðherra; Bjarni Benediktsson

Þér er hér með sagt upp störfum. Þér er sagt upp störfum sem ráðherra og þingmanni. Við krefjumst þess að þú víkir nú þegar.

Ástæður uppsagnarinnar eru fyrst og fremst það kjarkleysi, sú spilling og sá dómgreindarbrestur, sem þú hefur sýnt af þér starfi. Þú hefur vísvitandi blekkt okkur, ítrekað logið að þjóðinni og þar með gerst brotlegur við okkur öll. Gleymdu ekki að þjóðin er þinn æðsti yfirmaður.

Velferð okkar og gildi sem þjóðar eru grundvölluð á samstöðu, samkennd, heiðarleika og góðvild okkar allra. Þú hefur ekki sýnt okkur samstöðu, þú hefur ekki sýnt okkur samkennd og þú hefur ekki komið heiðarlega fram.

Hagmunaárekstrar eru alvörumál og stórhættulegir. Þeir eru til þess fallnir að skapa óöryggi og vantraust. Þrotlausu starf þínu fyrir efnafólk í landinu verður að linna nú þegar.

Málið er ósköp einfalt. Við treystum þér ekki. Við treystum þér ekki til að takast á við þá spillingu sem nú þarf að uppræta. Við treystum þér ekki til að gæta hagsmuna öryrkja, aldraðra og þeirra sem minna mega sín í þjóðfélaginu.

Þjóðin treystir þér ekki til að gæta hagsmuna sinna. Við krefjumst þess að þú látir af störfum nú þegar, sem þingmaður og ráðherra.